BUTUAN CITY – Bisan pa man sa mga hulga gikan sa ubang mga nasud sa Middle East sama sa Iran ug Lebanon tungod sa paglaban nila sa Hamas didto sa Palestine, pabiling normal og kalmado ang sitwasyon karon sa Israel ilabina sa capital Tel Aviv.
Sa eksklusibong pakighinabi sa Bombo Radyo Butuan, gipadayag ni Bombo international correspondent Marc Pleños nga sa 18 ka tuig na niyang pagpuyo sa maong nasud, normal na alang kaniya ang mga buto-buto nga mulanog gikan sa mga utlanan sa Israel gikan sa ubang mga nasud,.
Wala matud pay angayang kabalak-an ang tanan sa ilang seguridad tungod kay luwas man sila.
Dili na usab ikakurat ang bahad nga all-out war kanila sa mga Hezbollah nga atua sa Lebanon ilabina nga kada-adlaw magpalupad ang mga niini ug rockets ingon man drones apan didto lang kini kutob sa border.
Dili na usab nila ikatingala ang mga nasud nga gustong manghilabot sa Israel tungod kay bisan niadtong unang panahon, nakalatid sa Bibliya ang mga gustong mu-ilog niini apan dili mulampos.
Dugang pa ni Pleños, ang mga nagpuyo sa borders sa Israel, mahimo matud pang muadto sa mas luwas nga dapit kung sa ilang paminaw delikado ang ilang kinabuhi tungod sa matag-karon ug unya nga pagpamomba sa mga militanteng Hezbollah ug Hamas.
Nanghinaut na lang siya nga unta magka-uli na ang maayong kabubut–on talis a Israel ug Iran aron hapsay na unya ang tanan.
