BUTUAN CITY – Gimando ni Department of Migrant Workers Hans Leo Cacdac, ang pagpa-uli gilayon dinhi sa Pilipinas sa usa ka empleyado sa Migrant Workers Office sa Bahrain human mikaylap sa social media ang video nga nagpakita nga gikasab-an niini ang mga overseas Filipino workers kon OFWs nga nangayo og tabang pinansyal.
Matod ni Cacdac, dili madawat ang ingon nga pamatasan batok sa mga Pilipinong nagtrabaho sa gawas sa nasod dungan sa pagsiguro nga padayon nga mutabang ang gobyerno sa mga OFWs uban sa respeto ug pag-atiman.
Sa viral nga video, makita ang usa ka lalaki sa gawas sa opisina sa migrant workers sa Bahrain nga nagyawyaw ngadto sa mga Overseas Filipino Workers nga mupa-uli na kay wala na’y pondo sa gobyerno alang sa financial assistance.
Nadungog usab sa video nga gibutyag sa staff nga ang opisina sa Manila ang nagsulti nga wala na’y nahibiling pondo.
Nigawas usab ang insidente samtang nagkadaghan ang reklamo batok sa pipila ka opisyal sa gobyerno sa Middle East, lakip na ang giingong dili pagtubag sa hotline alang sa mga OFW nga nanginahanglan og tabang.
Sa laing bahin, nagpagawas na og pahibalo ang Philippine Embassy in Manama nga temporaryong gipahunong ang paghatag og financial assistance sugod Marso 6 tungod sa padayon nga missile ug drone attacks sa rehiyon, busa gipahugtan ang seguridad ug dili sa muna modawat og walk-in applicants.
Sumala sa pinakabag-ong datos, ang Bahrain adunay pinakataas nga ihap sa mga OFWs nga nangayo og repatriation (278), gisundan sa Abu Dhabi nga adunay 246, ug Dubai nga adunay 231.
Gibanabana nga mu-abot ngadto sa 2.5 milyones ka mga Pilipino ang nagtrabaho sa lain-laing nasod sa Middle East.
