BUTUAN CITY – Full force ang mga opisyal sa lokal nga kagamhanan ning siyudad sa Butuan sa gipahigayong wreath-laying activity kaganinang buntag ngadto sa lubnganan sa gi-ilang ‘Father of Butuan City’ nga si anhing Congressman Marcos ‘Kakoy’ Calo sa may Old Catholic Cemetery.
Mismong si Mayor Ronnie Vicente Lagnada ang nanguna sa maong kalihukan isip highlight sa ika-69 nga anibersaryo sa pagkahimong charter city ning siyudad.
Sa iyang pagpamulong, gibutyag ni Mayor Lagnada nga ang esensya sa wreath-laying mao ang paghandom sa nahimo sa anhing kongresista dinhi sa dakbayan sa Butuan.
Makatarunganon lamang matud pa ang paghandom niining adlawa kada-tuig tungod kay si Kakoy Calo ang nahimong dalan nga nakab-ot karon sa Butuan ang iyang nahimutangan.
Kini pinaagi sa iyang pagduso sa RA 523 – ang balaud nga maoy nagmugna sa dakbayan sa Butuan kansa maoy iyang gibilin nga legasiya nga angayang sundon uban sa pag-atubang sa mga hagit alang sa kalambuan ning siyudad nga mao usa’y target sa kasamtangan niyang administrasyon.
Bisan matud pa og lahi ang hagit niadtong unang panahon og sa kasamtangan, apan giklaro sa mayor nga susama ra gihapon ang diwa sa mga Butuanong gustong maghatag og tinud-anay nga transformation alang ning siyudad.
Alayon niini, nanawagan siya sa tanang mga Butuanon nga makighi-usa kanilang mga local officials aron makab-ot ang kalambuang gidamgo alang sa Butuan.
