BUTUAN CITY – Gitambungan sa gatusang mga membro sa Kabus Padatoon kon KAPA Community Ministry International ang gipahigayong prayer rallyl kagabii sa may Luneta Park sa Surigao City.
Dinhi gihatagan og higayon ang mga sakop sa KAPA sa Surigao City paghalad og pag-ampo uban ang ilang mga testimonya nga matud pa nakatabang kanila ang maong investment scheme tungod kay nakalingkawas sila sa kalisdanan.
Nanawagan usab sila kang Pangulong Rodrigo Duterte nga dili ipahunong ang operasyon sa KAPA nga nakatabang matud pa sa mga kabus.
Samtang mi-ani og managlahing reaksyon ang gihimo sa mga KAPA members tungod kay duna’y uban nga midapig kanila samtang duna usa’y uban nga supak.
Alang sa uban, gipakita lang matud pa sa mga nangapil sa prayer vigil kung unsa nila kamahal ang kwarta og ang uban usab mikwestyon kung tungod ba sa Ginoo ang ilang pag-apil o kaha tungod sa kwarta.
