BUTUAN CITY – Gianunsiyo sa Commission on Elections kon Comelec nga dapat nang magparehistro ang tanang survey firms sa poll body sa panahon sa eleksyon.
Sigon ni Comelec Chairman George Erwin Garcia, bugtong mga pre-registered entity lang ang dunay pagtugot nga mohimo ug magmantala ug mga survey sa piniliay.
Base sa Resolution No. 11117 nga giaprubahan sa Comelec, ang mohimo og election survey kinahanglang magparehistro sa Political Finance and Affairs Department sa Commission. Gihatagan og 15 ka adlaw ang mga kumpanyang nag-survey para magparehistro sa Comelec.
Gitahasan usab sa Comelec ang ilang Education and Information Department nga nagmugna og verification mechanism.”
Gitin-aw ni Garcia nga ang nasangpit nga resolusyon dili aron pug-ngan ang mga survey firms sa pagpagawas sa election survey tungod kay makabenepisyo niini ang mga botante.
Ang importante lang matud pa nga tukma ang mga proseso og parameters lakip na ang pagkapatas sa tanang mga kandidato.
