BUTUAN CITY – Malampusong na-detonate sa tropa sa 23rd Infantry ‘Masigasig’ Battalion, Philippine Army ang mga improvised explosive devices kon IEDs ug mga bomb-making materials nga nakumpiska sa sunod-sunod nilang gipakusgang combat operations sa Agusan del Norte.
Gihimo ang detonation sa ilang headquarters sa Jamboree Site, Purok 6, Barangay Alubihid, lungsod sa Buenavista, Agusan del Norte uban sa suporta Explosive and Ordnance teams gikan sa 23rd IB ug sa Philippine National Police Mobile Force Battalion.
Apil sa gipabusikad ang walo ka mga anti-personnel mines ingon man ang 254 ka mga pakete sa ammonium nitrate nga gisulod sa onse ka mga plastic containers.
Sigon ni Lt. Col. Julius Cesar Paulo, ang acting 23rd IB commanding officer, tumong sa disposal ang paghatag og impormasyon kung unsa ka makadaut sa mga tawo, propiedad ug komunidad ilabina sa mga inosenteng sibilyan ang maong mga eksplosibo.
Kini matud pa ang hinungdan nga hugot nga gidili ang mga IEDs sa mga international agreements apil na sa Ottawa Treaty ug Geneva Convention tungod kay dili lamang kini mumugna og mga casualties sa tropa sa gobyerno kondili apil na sa mga inosenteng sibilyan diha sa kabaranggayan.
Dugang pa sa opisyal, ang pagkarekober sa mga IEDs ug mga war materials. nakapakunhod sa kapasidad sa mga kaaway sa gobyerno paghatag og mga casualties sa torpa sa kagamhanan.
