BUTUAN CITY – Andam na ang Makabayan bloc nga ipresenta ngadto sa House Committee on Justice ang mga ebidensya aron mapalig-on ang ilang gidusong impeachment complaint batuk kang Vice President Sara Duterte nga sugdan pagtuki karong adlawa.
Sa eksklusibong pakighinabi sa Bombo Radyo Butuan, gipadayag sa usa sa mga reklamante nga si kanhi Alliance of Concerned Teachers kon ACT Teachers partylist Rep France Castro, dili na ma-dismiss ang ilang reklamo batuk sa besi presidente susama sa nahitabo sa reklamo nila batuk kang Pangulong Ferdinand Marcos Jr.
Madumdumang wala nila napresenta sa justice panel ang mga ebidensya dihang gipangitaan sila niini sa komite atol sa recitation pa lang unta sa ilang reklamo kansa wala matud pa sa patakaran.
Kampante si Castro nga mu-abante ang ilang reklamo human gipadayag ni House Justice Committee chairman Gerville Luistro nga kung unsa nga proseso ang ilang gihimo sa impeachment complaint batuk kang Pangulong Ferdinand Marcos Jr, susama ra ang ilang buhaton alang sa besi presidente.
Kampante ang ilang kampo nga mahatag nila ang mga ebidensyang magpamatuod sa ilang mga akusasyon dungan sa ilang paglaum nga bisan usa lang sa upat ka mga impeachment complaints batuk sa besi presidente, mapaboran sa Senado isip impeachment court aron hingpit na matud pang ma-impeach si VP Sara.
