BUTUAN CITY – Duha ka higayong gi-water cannon ug gidikitan sa barkong China Coast Guard 3302 ang barko nga BRP Datu Pagbuaya sa Bureau of Fisheries and Aquatic Resources kon BFAR samtang naggpahigayon og routine maritime patrol ka-uban ang Philippine Coast Guard kon PCG sa bisinidad sa Bajo de Masinloc aron unta suportahan ang mga Pilipinong mangingisda nga nanagat sa maong lugar.
Sigon ni PCG spokesperson for the West Philippine Sea (WPS) Commodore Jay Tarriela, upat ka mga barko sa China Coast Guard vessels ug duha sa People’s Liberation Army Navy ang nag-water cannon sa BRP Datu Pagbuaya kaganinang alas-6:30 sa buntag. Gitutok pa ang water cannon sa navigational antenna sa BRP Datu Pagbuaya nga gisundan sa tinuyo nga pagdikit sa straboard side sa barko sa BFAR.
Pagka-alas-6:55 sa buntag, subling gi-water cannon sa susamang CCG vessel ang BRP Datu Pagbuaya. Dihang wala pa makontento, gisundan, gibabagan ug gimani-obra ang uban pang barko sa PCG apil na ang BRP Teresa Magbanua nga gi-maniobra sa PLA Navy vessel 500 ug CCG 503 samtang ang BRP Cabra, gi-maniobra usab sa CCG 3104 sa distansiyang 300-yarda.
Bisan pa man sa maong insidente, pabiling gibarugan sa PCG ug sa BFAR ang ilang commitment nga protektahan ang katungod ug kaluwasan sa mga mangingisda nga anaa sulod sa atong hurisdiskiyon.
