BUTUAN CITY – Napasaka na ang kaso pinaagi sa inquest proceedings batuk sa tulo ka mga babaye ug 1 ka bayot human nasikop sa anti illegal drug operation sa niaging ala1:30 sa hapon sa may Purok Palmera, Barangay Mabua, Tandag City, Surigao Del Norte.
Naila ang mga suspetsado nga sila Joan Lozada Enao, 29-anyos og residente sa Purok Manga, Brgy. Cagdapao, Tago, Surigao del Sur; Arliza Mae Quiñonez Basibas, 21-anyos, dalaga nga taga Purok Makisama, Brgy. Rosario, Tandag City; Caren Ongria Prado, 26-anyos, dalaga nga residente sa Purok Comet, Brgy. Telaje, Tandag City ug Nicole Navarette Ponlaon, 24-anyos, bayot nga taga Purok Manga, Brgy. Cagdapao, Tago, Surigao del Sur.
Sigon ni P/Chief Insp. Rey Sorida, Hepe sa Tandag City Police Station, duha unta ka buybust operation ang ilang ipahigayon batuk sa duha ka mga target nga sila Joan Enao ug Arliza Basibas apan na-atol nga nagkuyog ang duruha.
Apan wala nadakpan ang target usab nga kapuyo ni Basibas nga sa ilang impormasyon, taga Davao area kini.
Bisan paman, na-aktuhan usab nga nagsuyop sa ginadiling drugas ang usa ka babaye ug usa ka bayot hinungdang giapil kini sa pagsikop.
Nakumpiska sa maong operasyon ang 9 ka sachet nga dunay sulod sa gitoohang shabu nga mitimbang og .7627 gramos nga dunay market value nga 9-mil pesos.
Lakip na ang usa ka 500 pesos nga marked money, mga illegal drug paraphernalias, og 3 ka cellphones.
Gikustudiya ang mga suspetsado sa Tandag City Police Station alang sa tukmang disposasyon.