BUTUAN CITY – Upat ka mga armas og mga rifle grenades ang nakumpiska sa mga sakop sa Criminal Investigation and Detection Group kon CIDG-Caraga human gi-raid ang pinuy-anan ni Vice Mayor Jenrey Montante sa lungsod sa Kitcharao, Agusan del Norte kagahapon.
Sigon ni CIDG-Caraga Regional Chief Choli Caduyac, ang body guard sa maong opisyal maoy original target sa ilang operasyon apan apil matud pa ang pangalan sa besi mayor sa search warrant rason nga apil kini sa ilang gisuhid ilabina nga wala sila’y nakuha gikan sa pinuy-anan sa subject person nga nalambigit matud pa sa gun-running.
Duha ka buwan matud pa nilang gipanid-an ang subject person adiser gisumbong ngadto sa korte.
Aminado usab ni Caduyac nga mipatim-aw og kalit ang mga sakop sa 29th Infantry Battalion, Philippine Army.
Nagtuo ang opisyal nga nagpatabang sa mga sundalo ang besi-mayor tungod kay usa matud pa kini ka retiradong sundalo.
Dali matud pa niyang gitawagan ang police provincial director ning lalawigan aron ipa-abot ngadto sa tag-as nga mga opisyal sa kasundaluhan ang ilang gihimo.
Kini ilabina nga wala’y papel ang maong mga sundalo sa ilang operasyon tungod kay support team na nila ang Special Action Force kon SAF. (Beth Ruiz)
