BUTUAN CITY – Han-ay na ang aktibidad nga himoon sa mga supporters sa Duterte Family ugmang adlawa dinhe sa siyudad sa Butuan isip pagtimbaya usab sa ika-80 nga adlaw’ng natawhan ni Kanhe Pangulong Rodrigo Duterte.
Sugdan kini sa Solidarity Walk or Run alang sa mga Runners, Bikers og Dog lovers sa alas 4:30 sa buntag ang pagtapok diha sa Open ground, atubangan sa Capitol ngadto na sa Guingona Park.
Human niini dunay himoong Zumba, Birthday singing og painitan. Sa hapon dunay himoong solidarity rally pasado alas 3:00 sa Sports Complex nga sundan sa pre-program o concert sa alas 5:00 sa hapon ngadto sa alas 7:00 sa gabii.
Sundan kini sa rally proper hangtud sa alas 9:00 sa gabii diin dinhe masaksihan ang pagkanta, pag-ampo, video greetings og pagkanta ug Happy Birthday.
Una nang gibutyag ni Engr. Dioric Gavino, ang secretary general sa Sara All Movement nga dili moubos sa Mu-abot sa 16 ka mga lungsod og siyudad sa Caraga Region ang mohimo og panagtapok isip pagtimbaya sa adlaw nga natawhan ni kanhi Pangulong Rodrigo Duterte.
Samtang dunay zoom meeting usab nga himoon ang DDS-Sara All Movement unyang alas-10:00 sa gabii hangtud na sa pagsugat sa adlaw nga natawhan ni kanhi Pangulong Duterte.
Lauman ang daghang molambigit niini lakip na ang mga Overseas Filipino Workers samtang kumpirmado na usab ang pag-apil ni Mayor Baste Duterte og gi-imbitar sila Kitty Duterte, Gringo Honasan og Jimmy Bondoc.
