BUTUAN CITY – Gikabalak-an karon sa katawhan sa United Kingdom, ang paspas nga pagkaylap sa meningitis outbreak tungod kay gawas nga talagsaon kaayo kini, lisod pa usab sabton gumikan kay wala pa kini mahitabo kaniadto ug kusog kaayo ang pagkatap human natala ang 20 ka mga kaso sulod lang sa usa ka gamay nga lugar sa Kent sukad sa weekend.
Sigon sa mga health experts, dili kini normal nga pattern tungod kay kasagari, ang meningitis mutala lang og usa-usa ka kaso.
Nahibal-an nga daghang tawo ang naay meningitis B bacteria sa ilong, ug kasagaran dili makadaot.
Sa UK, mga 10% sa mga tawo aduna niini nga kaso ug mas taas diha sa mga batan-on nga mi-abot sa mga 25%.
Sumala ni Prof Andrew Preston, duha ang posibleng rason niini, usa ang posibleng kusog kaayo nga pagkatap sa bacteria ug mas delikado ug mas kusog na kining makadaot karon. Posible nga ang hinungdan naa sa bacteria mismo, sa binuhatan sa mga tawo, sa palibot, o kombinasyon sa tanan.
