BUTUAN CITY – Wala pa man gideklarang mananaog sa Commission on Elections kon COMELEC-Butuan, apan tungod sa layo nga biya niya sa nagpadayong hagpatay sa mga balota gikan sa ka-atbang nga si Norbert Pagaspas, nagpasalamat na si incumbent Mayor Ronnie Vicente Lagnada ngadto sa tanang katawhang misalig sa iyang liderato.
Sa ekskusibong pakighinabi sa Bombo Radyo Butuan, gipadayag sa mayor nga padayon ang pagpatuman niya sa mga plano alang sa dugang pang mga kalambuan ning siyudad. Wala matud pa’y angayang kabalak-an ang katawhan ning siyudad tungod kay tumanon sa One Team Butuan ang ilang mga plano.
Mapasalamaton usab si Mayor Lagnada nga hapsay ang piniliay ning siyudad ingon man taas ang turn-out sa mga tawong mi-exercise sa ilang katungod nga mabutaran ang mga kandidatong sa ilang lantaw, mudumala og maayo ning siyudad ug nasud sa kinatibuk-an.
Sa pagka besi mayor nanguna si Lawrence Lemuel Fortun samtang sa pagka-kongresista sa unang distrito sa Agusan del Norte ug Butuan City, nanguna si Joboy Aquino ug sa pagka-konsehal ning siyudad sa Butuan nakasulod sa Top 15 sila Omar Andaya, Cromwell Nortega, Rey Desiata; John Gil Unay Sr; Cherry mae Busa; Ehrnest John Sanchez; Vincent Rizal Rosario; Victor Plaza; Eduardo Gonzales; Arturo Gano, Ramon Carampatana; Dino Sanchez, Aljon Azote; Dodo Cembrano ug Rene Guevarra.
