BUTUAN CITY – Dako ang pagpasalamat ni Davao City Mayor Sebastian ‘Baste’ Duterte ngadto sa tanang katawhang Filipinos ilabina sa mga Dabawenyo nga padayong misuporta sa ilang pamilya subay sa pagpanglutos nga ila karong nasinatian human gidakop ang amahan niining si kanhi Pangulong Rodrigo Duterte.
Sa iyang pag-atubang sa mga tawong nagtukaw sa gawas nga bahin sa panimalay sa iyang amahan aron magbantay batuk sa nabani-og nga pag-raid matud pa sa pinuy-anan sa kanhi pangulo, gihangyo pa niya ang mga tawo nga anaa gawas sa ilang panimalay nga mupa-uli na tungod kay kaya ra nila ang tanan.
Gi-angkon sa mayor nga sa katawhan na lang sila misalig sa pagkakaron.
Gipasalamatan usab niya ang mga media men nga apil sa nagbantay sa bisan unsa mang mahimong kalambuan dayong padayag sa iyang daw pagkadismaya na sa mainstream media.
