BUTUAN CITY – Bukas ang kapulisan sa Placer, Surigao del Norte nga imbestigahan ang Matrix investment scam, higayong duna’y membro nilang maka-abot sa ilang buhatan aron magreklamo.
Sa eksklusibong pakighinabi ning sibyahan, gibutyag ni Police Major Erwin Cordano – hepe sa kapulisan sa maong lungsod, base sa ilang inisyal nga impormasyong nakuha, ang scheme sa Matrix nga nakapadani og maayo sa mga tawong nag-invest mao ang kada-semanang 35 ngadto sa 40-porsientong pagbalik sa ilang kwartang gibubo.
Nadunggan nilang nangreklamo na matud pa ang ilang mga investors tungod sa kalit nga pag-undang niini apan wala pa’y naka-abot sa ilang police station.
Base usab sa nakuha nilang impormasyon, nagsugod kini niadtong Enero ning tuiga sa Brgy. Bad-as og paspas nga midani sa mga tawong gikan sa nagkada-iyang hut-ong sa katilingban tungod sa kadako sa kwartang mabalik kanila kada-semana.
Makonsidera usab nga tibuok Caraga region na ang scope sa operasyon sa Matrix tungod sa mga membrong nag-post sa ilang nakuhang kwarta nga gikan sa nagkada-iyang lalawigan ning rehiyon.
Ang inisyal nga problemang ilang nakita karon mao ang kawala’y opisina sa Matrix nga ilang makita rason nga maglisod sila unya paggukod sa mga nagpaluyo niini higayong makadawat na unya sila og mga reklamo.
