BUTUAN CITY – Na-endorso na ngadto sa National Economic and Development Authority kon NEDA ang proposal sa priority project nga Masau International Seaport sa lokal nga kagamhanan ning dakbayan sa Butuan.
Kini aron mabuhatan na ug feasibility study ang maong proyekto. Sigon ni Paolo Gogo, Public Information Officer sa Butuan City Government, gi-prayoridad karun ni Butuan City Mayor Ronnievic Lagnada ang pag-industrialized sa siyudad ilabina kay strategic ang lokasyon niini nga dool sa dagkong mga dakbayan sama sa Davao, Cebu ug Cagayan De Oro.
Gawas pa kini sa napalambu na nga Bancasi Airport. Giklaro pa ni Gogo nga ang nasangpit nga programa dunay partnership sa Japan International Cooperation Agency kon JICA nga experto sa hisgutanang technical, gawas pa sa tabang financial.
Gibutyag pa sa opisyal nga kung hingpit nang ma-implementa ang maong proyekto, mas dali nang makasulod ang bisan unsang padala o produkto gikan sa ubang mga nasud. Gawas pa kini sa daghang uportunidad sa trabaho nga mahatag sa mga Caraganon.
Tungod kay mamahimo nang economic zones ang area sa Masau. Napili matud pa sa JICA ang dakbayan sa Butuan nga ilang hatagan ug tabang, tungod sa hisgutanang peace and security diin nanguna niini ang siyudad.
Lakip na ang pagka-agricultural city sa Butuan. Swerte matud pa ang dakbayan tungod kay ang kasamtangang chairman sa PEZA usa man ka Butuanon pinaagi ni Charito Plaza nga dakong ikatabang sa approval sa proyekto.
Naka-estorya na matud pa sa maong opisyal si DOTr Sec. Arthur Tugade may kalabutan na sa maong hisgutanan.
