BUTUAN CITY – Gikumpirma ni Jess Ivan Saburao, ang management specialist sa City Environment and Natural Resources Office kon CENRO-Butuan, nga positibo sa fecal coliform ang kabaybayunan sa Brgy. Masao ning siyudad sa Butuan partikular ang kaligu-anan sa mga tawo.
Base kini sa gihimong water quality sampling ug monitoring sa mga personahe sa Environmental Management Bureau kon EMB-Caraga. Sa eksklusibong pakighinabi sa Bombo Radyo, gipadayag ni Saburao nga gihimo ang water quality sampling sa mga kaligu-anang coastal areas sa tibuok rehiyon.
Migawas sa gihimong sampling sa ahensya nga base sa tanan nilang parameters, grabe kataas ang fecal coliform level sa maong baybayon.
Gidugang sa opisyal nga ang maong resulta, gi-forward na sa EMB-Caraga ngadto sa lokal nga kagamhanan ning siyudad aron aksyunan gilayon kini.
Alayon niini, duna na’y gihimong collaborative meeting sa mga hingtungdang buhatan ug ang nalambigit nga barangay diin gihisgutan ang rekomendasyon aron makunhuran ang fecal coliform level sa maong baybayon.
Usa sa mga gitu-uhang hinungdan niini mao ang pagpgawas og hugaw sa mga binuhing kahayupan sama sa iro ug iring diha sa baybayon ingon man ang mga septic tank nga anaa lang sa baybayon.
Sa kasamtangan, gi abisuhan na ang mga opisyal sa barangay sa istriktong ipatuman ang kahinlo sa maong dapit kondiin kinahanglan nga ang tanang panimalay dunay konkretong septic tank, gidili na usab ang pagbuhi sa mga iro gikan sa kabalayan ug kinahanglang duna’y saktong pagdumala sa basura
