BUTUAN CITY – Gipasakaan na og kaso ang usa sa duha ka mga mangingisda sa Tandag City sa lalawigan sa Surigao del Sur nga nakarekober sa 36 ka bloke sa floating cocaine niadtong buwan sa Pebrero ning tuiga.
Kini human makumpirmang iyang gitago ang unom rason nga nasayrang 40 ka bloke sa floating cocaine diay ang ilang narekober.
Ang usa sa mga mangingisdang si Ronnie Navales, 49-anyos, residente sa maong lugar gikasuhan kaganinang buntag lang og paglapas sa section 11 sa Republic Act 9165 pinaagi sa inquest proceedings human mi-angkong gitago niya ang unom ka mga bloke.
Sigon ni Police Major Rey Sorreda, hepe sa Tandag City Police Station, niadtong adlaw nga gitahan ni Navales og ka-ubanan niining si Ryan Apelo. 23-anyos, ang 34 ka bloke sa floating cocaine, duda na siyang kulang kini rason nga iya kining gipapanubayan sa iyang intelligence officers.
Paglabay sa kapin usa ka buwan, nakumpirmang gitago gyod ni Navales ang unom ka bloke nga wala’y kasayuran ang iyang ka-ubanan, og tungod kay na-pressure na, gi-uli niya ang upat na lang tungod kay ang duha na-flush na niya sa toilet bowl.
Nasayran pang duna matud pa’y nakapalit og parte lang sa cocaine nga gitago sa suspek kondiin nasinatian sa buyer niini ang pagpaminhod sa iyang apapangig nga natural reaction lang matud pa sa mga tawong mugamit niini.
Posible matud pang na-engganyo ang suspek nga itago kini human nasayran nga ang matag-bloke nagkantidad og 5-milyones pesos.
Mahinumdumang gihatagan na og livelihood assistance sa lokal nga kagamhanan sa Tandag City, Surigao Del Sur ang pamilya sa duha ka mangingisda wala pa’y labot sa gihatag nga tag-duha ka sakong bugas gikan sa PRO-13 samtang gipa-convert sa cash ang balor sa 30 ka sakong bugas.
