BUTUAN CITY – Dili pa magpatuman og mass repatriation ang kagamhanan taliwa sa miinit nga giyera tali sa Israel, Iran ug uban pang mga kasikbit nga nasud Middle East.
Sigon ni Department of Migrant Workers kon DMW Secretary Hans Leo Cacdac nga wala pay mass repatriation tungod kay ang mandatory level alang niini mao ang Alert level 4.
Sa karun duna nay 80 hangtud sa 100 ka OFWs gikan sa Dubai ang mihangyu nga makauli sila apan sumala ni Cacdac imposible pa kini tungod kay sirado ang airspace sa Dubai ug ang airports tungod sa pag-atake sa Iran.
Gihatagan una nila og nag-unang panginahanglan ang mga OFWs sama sa pinuy-anan, pagkaon, tubig ug uban pa samtang gi-andam ang ilang paghikling.
Nasayran nga giisa na sa Overseas Workers Welfare Administration (OWWA) ang Alert Level 2 para sa UAE, Bahrain, Qatar, Kuwait, ug Israel, nga nagresulta sa deployment ban sa newly hired OFWs.
Anaa sa Alert Level 3 usab ang Lebanon samtang ang Jordan nagpabilin sa Alert Level 1.
Samtang wala pay mass repatriation, giabisuhan sa kalihim ang mga Pinoy sa middle east nga mag-amping og paaboton ang mga advisories gikan sa embahada, sa one country team leaders, sa mga ambassador sa grounds, consuls general ug importanteng sundon ang protocols sa usa ka nasud diin sila nahimutang.
Gisiguro usab ni Cacdac nga klaro ang direktiba ni Pangulong Ferdinand Marcos kanila nga makabaton og hugot nga koordinasyon sa Department of Foreign Affairs (DFA) lakip na sa tanang ambassadors sa Gulf states ug sa State of Israel lakip na usab sa Middle East.
Dunay nakagahin usab nga meeting points o relocation points kada nasud diin dunay gibutang sa country level.
