BUTUAN CITY – Gikumpirma ni Brigadier General Arsenio Sadural, Brigade Commander sa 901st Infantry Brigade, Philippine Army nga kapin sa 5-milyones ka pesos ang patong sa ulo sa namatay nga si Myrna Sularte kon Ka Maria Malaya. Apan giklaro sa opisyal nga wala pa sila karun sa pagtumbok sa pwedeng makadawat sa maong reward money tungod kay nakatutok pa sila sa napadayog military operation batuk sa misibat nga ka-ubanan ni Ka Maria Malaya.
Sumala ni Sadural, duna pay gibana-banang 40 ka rebelde nga kaubanan niini ang padayon nila gigukod kansa mas ubos sa na-monitor nila nga 120 ka mga rebelde niadtong Nobyembre 2023. Apan gitin-aw niini nga gusto silang ma-neutralize ang mga niini pinaagi sa pagsurender og dili sa kamatayon rason nga padayon siyang nanawagan sa mga niini nga mubalik na sa sabakan sa balaod aron makapahimulos sa nindot nga programa sa gobyerno, ang Enhanced Local Integration Program kon E-CLIP.
Una nang gipadayag sa opisyal nga dakong kawad-on ang kamatayon ni Ka Maria Malaya sa iyang grupo diin wala pa silay na-monitor nga mohulip sa iyang gihawiran nga katungdanan isip secretary sa komunistang grupong Northeastern Mindanao Regional Committee (NEMRC) ug miyembro usab sa political bureau sa Communist Party of the Philippines.
Nasayrang natawo si Ka Maria Malaya sa Purok-4, Barangay Salvacion, Bayugan City, lalawigan sa Agusan del Sur ug misulod kini sa walhong kalihukan human nakagradwar sa kursong Bachelor of Science in Agricultural Technology niadtong 1997 ug tuig 1999 dihang nahimo kining secretary sa North Eastern Mindanao Regional Committee.
