BUTUAN CITY- Naluwas ang Mayor sa Shariff Aguak, Maguindanao del Sur nga si Mayor Akmad “Mitra” Ampatuan human gi-ambush ang ilahang convoy nga gisakyan nga nahitabo alas 6:30 kaganinang buntag, hinungdan nga duha sa iyang mga escort ang nasamdan.
Sumala ni Anwar Kuit Emblawa, executive assistant ni Mayor Akmad Mitra Ampatuan, luwas na ang mayor human gi-ambush ang iyang itom nga Toyota Land Cruiser samtang nagbiyahe sa dalan sa Barangay Poblacion, Shariff Aguak.
Kini na ang ikatulo nga higayon nga gi-ambush si Ampatuan ug nakaluwas gihapon. Ang iyang back-up nga sakyanan, usa ka Toyota pick-up, nadaot usab human maigo sa mga bala.
Sa gipagawas nga CCTV footage makita ang mga suspetsado nga nigawas sa ilahang puti nga Suzuki mini van (KAO-9462) ug nagpabuto sa usa ka high powered firearms rocket-propelled grenade (RPG) diin miigo sa sakyanan ni Mayor Ampatuan.
Gidugang pa ni Emblawa nga napatay gilayon sa kapulisan ang upat ka suspek atol sa hot pursuit operation sa national highway sa Shariff Aguak. Sa pagkakaron ginapanubayan pa ang insidente ug wala pay pamahayag ang Mayor.
