BUTUAN CITY – Mimugna og lapad nga damyos ang mitay-og nga magnitude-7.4 nga linog sa Vanuatu duol sa capital, Port Vila kansa mi-igo pasado alas-12:53 sa udto oras sa maong nasud kon kon alas-9:53 sa buntag, oras sa Pilipinas.
Sigon sa United States Geological Survey kon USGS, natala kini sa giladmong 57-kilometros apan ang Pacific Tsunami Warning Center sa Hawaii, mitaho nga mi-igo kini sa giladmong 10-kilometros.
Inisyal nga na-obserbahan sa Pacific Tsunami Warning Center ang mga tsunami waves hangtud nga ilang nakumpirma nga wala’y tsunami threat ug wala usa’y tsunami threat ngadto sa Australia.
Makita sa gipang-post nga mga videos sa social media ang damyos sa building diin nahimutang ang US ug French embassies, apil na United Kingdom ug New Zealand High Commissions sa Port Vila.
Duna pa’y nahirig nga building sa main street sa siyudad nga midat-og sa mga natungod nga sakyanan. Duna usa’y natala nga landslide nga mitabok sa parte sa pantalan sa Port Vila.
Tungod sa kakusog sa pagtay-og, offline ang mga Vanuatu government websites samtang dili usab matawagan ang phone numbers sa mga pulis ug ubang mga public agencies.
