BUTUAN CITY – Gikumpirma ni 1st Lt. Jonald Romorosa, Civil Military Operation kon CMO Officer sa 36th Infantry Battalion, Philippine Army nga wala pa makontak sa Local Crisis Management Committee ang naghawid karun sa tulo sa unang pito ka mga sibilyang gidagit sa New People’s Army sa may Sitio Ibuan, Brgy Mampi, Lanuza, Surigao del Sur apan gibuhian ang tulo pagkahapon.
Naila ang mga pabiling gibihag nga sila Ryard Badiang, 24-anyos; Wendil Delicuna, 25-anyos; ug Angelo Duazo, 34-anyos; samtang ang gibuhian mao sila Moni Bulando, 20 –anyos; Rodelo Montenegro, 40-anyos ug duha ka mga batang anaa sa edad nga 8 ug 12-anyos parehong mga residente sa maong dapit.
Gikumpirma usab sa opisyal nga nadugangan ang gidagit sa NPA human nga katapusan nilang nakuha si Jeffrey Delicuna sa susamang adlaw didto sa may Tandag City sa susamang lalawigan.
Hangtud karon, wala pa’y gihatag nga rason ang walhong grupo sa ilang pagdagit hinungdang dako ang pagtoo sa opisyal nga balos kini sa pagkamatay sa ilang 4 ka kaubanan sa may lungsod sa Carmen, Surigao Del Sur ilabina kay ang mga gidagit mga kanhi rebelde og mi-apply sa pagka-CAFGU kondiin ang duha aktibo nang mga Civilian Active Auxiliary kon CAA members.
Sa karun nagpadayon pa ang ilang combat operation samtang nangeta na usab og third party aron makignegosyar sa posibleng pagbuhi sa mga gidagit.
