BUTUAN CITY- Nagpahimangno ang mga Human Immunodeficiency Virus kon HIV advocates sa mga batan-on, hilabi na kadtong adunay risky sexual behaviors, nga magpa-test sa ilang HIV status aron masuta kung reactive ba sa maong sakit.
Sumala ni Iliganon advocate Elmer Masuta Jr, mas maayu nga ma-access sa publiko ang libre nga HIV testing sa gobyerno aron masayran gilayon ang kahimtang sa ilang panglawas.
Gipasabot usab ni Masuta nga ang sayu nga deteksiyon sa HIV makatabang sa mga tawo nga makadawat og sayu nga interbensyon ug medication, aron malikayan ang pagprogreso sa sakit ngadto sa Acquired Immunodeficiency Syndrome kon AIDS.
Dugang pa niini, nga ang responsableng pagpakigrelasyon, paggamit sa proteksyon, ug regular nga testing mao ang yawe aron mapanalipdan ang kaugalingon ug ang uban gikan sa HIV.
