BUTUAN CITY – Temporaryong i-lockdwon ang Lianga District Hospital sa lungsod sa Lianga, Surigao del Sur ingon man ang mga duol nga purok niini alang sa himuong disinfection human nga adunay usa ka 70 anyos nga COVID-19 patient ang namatay kansa unang gidala sa maong ospital.
Sigon ni Langa, Surigao del Sur Mayor Novelita Sarmen, nakalatid iyang gipagawas nga advisory kagahapon nga kini isip pagtuman sa protocol aron malikayan ang pagkaylap sa sakit ingon man mahatagan ug saktong panahon ang mga otoridad sa pagpatuman sa contact tracing hangtud nga makumpleto kini rason nga wala una’y dawatong pasyente o makagawas sa maong pasilidad.
I-lockdown usab sulod sa pipila ka mga adlaw ang mga panimalay sa kasilinganan sa pasyente ug ang entiro purok ug kasikbit nga purok.
Nasayrang ang maong namatay nga COVID-19 patient gidala sa LDH tungod sa pagsakit sa iyang tiyan. Sulod sa pipila ka adlaw, gi-rapid test kini ug nasutang nagpositibo hinungdan gi-refer dayun kini sa Adela Sierra Ty Memorial Medical Center sa Tandag City ug gi-swab test siya apan namatay kini ug dihang migawas ang resulta sa iyang swab Test, didto na nakumpirmang positibo kini sa COVID-19.
