BUTUAN CITY- Andam ang lokal nga panggamhanan sa Dakbayan sa Cabadbaran bisan dili pa sigurado ang hingpit nga partisipasyon sa mga drayber sa nagpadayong nationwide transport strike karong adlawa.
Sumala ni Roselyn Exaure, tigpamaba sa Cabadbaran City Local Government Unit kon LGU, dili pa matino kung tanan ba o 100 porsyento sa mga drayber sa dakbayan ang moapil sa welga.
Bisan pa niini, sigon niining andam ang lokal nga gobyerno sa bisan unsang kahimtang nga mahimong mahitabo.
Gani, nagpagawas na usab og contingency measures ang kapulisan ug LGU, lakip niini ang advisory gikan sa Philippine National Police sa Cabadbaran nga nagtanyag og libreng sakay pinaagi sa ilang patrol cars aron masiguro nga dili maapektuhan pag-ayo ang pagbiyahe sa publiko.
Gipasiugda usab sa LGU ang suporta ngadto sa mga drayber sa tricycle.
Sigon ni Exaure, wala pasagdi sa lokal nga gobyerno ang sektor sa transportasyon, ilabi na ang mga rehistradong tricycle drivers sa dakbayan kansa padayong nakadawat og benepisyo sama sa 10 kilos nga bugas matag drayber, mga sweatshirt nga mahimong ilang uniporme, ug fuel subsidy nga giandam na usab alang sa distribusyon bisan pa nga giplastar pa ang implementasyon niini.
Dugang sa tigpamaba, nga ang tanang reklamo ug panginahanglan sa mga tricycle drivers gitagaan og pagtagad sa lokal nga panggamhanan sa Cabadbaran ug sa pagkakaron padayon usab nga gimonitor sa LGU ang kahimtangan sa transport strike samtang gitan-aw ang aktwal nga lebel sa partisipasyon sa mga drayber sa dakbayan.
