BUTUAN CITY- Nangatarungan pag-usab ang legal defense team ni kanhi Presidente Rodrigo Roa Duterte nga wala na’y hurisdiksyon ang International Criminal Court kon ICC sa Pilipinas human sa pagbiya sa nasod gikan sa Rome Statute niadtong 2019.
Sa filing nga gisang-at ni Atty. Nicholas Kaufman niadtong Enero 23, 2026, gipunting niini nga ang usa ka Estado kinahanglan nga miyembro sa Rome Statute aron malakip sa imbestigasyon sa ICC, ug dili igo ang preliminary examination aron magsugod ang proseso.
Gipahimangnoan usab niini, nga ang pagtugot sa imbestigasyon sa Pilipinas gisugdan lang niadtong Setyembre 2021, duha ka tuig human sa pagbiya sa Rome Statute, gani lahi matud pa kini nga sitwasyon kumpara sa kaso sa Burundi nga giimbestigar sa ICC samtang miyembro pa ang nasod.
Giinsistir sa depensa nga ang interpretasyon sa prosekusyon makapawalag-bisa sa Article 127 Paragraph 2 sa Rome Statute ug kinahanglan nga ang korte mosunod sa husto nga proseso.
Gitawag usab ni Kaufman nga “opportunistic” ug “chameleon-like” ang argumento sa prosekusyon kansa nagpasabot nga dili klaro ang basehan sa ilang pagpadayon sa kaso.
Kahinumduman nga nadakpan si Duterte niadtong Marso 11, 2025 sa iyang pag-abot gikan sa Hong Kong ug gidala sa The Hague aron atubangon ang kaso sa ICC nga adunay kalabotan sa kontrobersyal nga anti-drug campaign sa iyang administrasyon diin giakusahan sa halapad nga kalapasan sa Human Rights.
Kini ang unang higayon nga usa ka kanhi lider sa Pilipinas gidala sa ICC, nga naghatag ug dakong kasaysayan ug kontrobersya sa politika ug hustisya sa nasod.
