BUTUAN CITY – Usa ka lalaki gikan sa Taiwan ang nag-ingon nga nagka-problema siya sa utok (brain haemorrhage) human siya nisakay og roller coaster sa United Arab Emirates kon UAE, kondiin kinahanglang operahan siya.
Nasayrang miadto siya sa Abu Dhabi ug nisakay sa sikat nga Ferrari World roller coaster nga kusog kaayo ang dagan kondiin human sa ride, malipong siya apan wala lang niya tagda kondiin sa iyang pagbalik sa Taiwan, nagsugod na og sakit ang iyang ulo.
Sa sinugdanan, wala’y nakita nga problema sa scan apan paglabay sa pila ka buwan, kalit siyang natumba ug gidala sa ospital. Didto nadiskobrehan nga adunay dugo nga nag-clot sa iyang utok rason nga gi-operahan siya aron tangtangon ang dugo.
Sigon sa doktor, dili kini normal nga stroke, kundili tungod sa kusog nga uyog sa lawas—sama sa epekto sa roller coaster.
Gi-explain usab sa doktor nga kung magkatigulang ang tawo, mukunhod og gamay ang utok ug mas dali kini molihok sulod sa ulo.
Tungod niini ug sa kahuyang sa mga ugat, mas dali kini maputol kung naay kusog nga pag-uyog.
