BUTUAN CITY – Padayong gipakisayran ang motibo sa nahitabong pagpanigbas patay kagahapon sa alas 3:00 sa hapon sa may Sitio Awasan, Barangay Colorado, lungsod sa Jabonga, Agusan Del Norte diin ang biktima ug suspetsado, managhigala.
Giila ni PO2 Luiz Randy Gardoque sa Jabonga Municipal Police Station, ang biktima nga si Rogemel Montesclaros Sabas, 26-anyos, menyu ug residente sa Purok-7 sa maong barangay samtang ang suspek mao ang higala niini nga si Jeffrey Ropano, Alyas Cocoy, hingkod ang panuigon, menyu nga residente usab sa maong dapit apan nagtrabaho sa minahan sa Libjo, Surigao Del Norte.
Sumala pa ni PO2 Gardoque, bag-ong nakauli ang suspetsado gikan nsa trabaho diin niadtong higayona nag-inom-inom kini ug ilimnong makahubog.
Apan sa dihang milabay ang higala niining si Sabas kalit kining gitigbas diin na-igo sa nawong ang biktima nga gidala sa balay-tambalanan apan nabugtuan kini sa iyang gininhawa.
Daling misibat ang suspetsado padulong sa Surigao area dala niini ang sundang nga gigamit sa kremin.
Sa karun, midangop na sa police station ang pamilya sa suspetsado kangsa misaad nga kumbinsihon nila ang suspek nga musurender samtang ang pamilya usab sa biktima pursigidong mopasaka ug tukmang kaso. (Rolan Janea)
