BUTUAN CITY – Miabot sa 5.3 milyones pesos nga kantidad sa gidudahang cocaine ang nakaplagang naglutaw-lutaw sa kadagatang sakop sa Barangay Quezon, Libjo, Dinagat Islands niadtong Domingo sa alas 7:10 sa gabii.
Base sa nakuhang impormasyon gikan sa kapulisan ning rehiyon, us aka mananagat nga nailang si Felix Miasco ang nakakaplag sa selyado nga bag nga dunay sulod nga bloke sa gitoohang cocaine.
Gi-turned over niya kini sa kapitan sa maong barangay kansa kini na ang mitaawag og ginsakpan sa Libjo Municipal Police Station nga maoy nagkustudiya na karun sa gitoohang illegal nga drugas.
Sigon sa kapulisan, gibalhin na sa duha ka plastic bags ang maong mga butang sa dihang gitunol ngadto sa otoridad tungod kay nadamyos naman ang orihinal niini nga putos. Gitakdang eksaminon ang nakumpiskang butang alang na sa kumpirmasyon.
Madugang kini sa una nang narekober nga 157 ka bloke sa cocaine sa tibook rehiyon nga mikantidad ug 992-milyones 625-mil pesos.
