BUTUAN CITY – Laing 180 ka mga Caraganons nga pila ka semana nang stranded sa kauluhang Manila ang naka-abot dinhi sa Butuan City kaganinang alas-10:05 sa buntag agi sa Bancasi Airport sakay sa Cebu Pacific flight NJ777.
Sa eksklusibong pakighinabi sa Bombo Radyo Butuan, gipadayag ni Evangeline Daba – airport manager sa Civil Aviation Authority of the Philippines kon CAAP-Butuan nga dinali-an ang ilang pag-akomodar sa maong mga pasahero tungod kay wala sila masultihi sa detalye sa ilang mga flights gawas lang sa impormasyong duna’y mangabot nga mga stranded Caraganons.
Sa maong ihap, pinakadaghan ang taga-Butuan nga mi-abot sa 66 nga gisundan sa Agusan del Norte ug Surigao del Sur nga tag-24, dayon ang Cabadbaran City nga duna’y 19, samtang 15 sa Surigao City; 13 sa Surigao del Norte; Agusan del Sur-12; 4 sa Bayugan City, 2 sa Tandag City ug usa sa Dinagat island province.
Gikan sa paggawas sa eroplano, gikuhaan gilayon sila og body temperature sa mga personahe gikan sa Department of Health kon DOH-Caraga uban sa lain pang mga personahe sa nagkada-iyang ahensya sa gobyerno alang sa pag-assess kanila adiser sila gipasakay sa misundo na kanilang mga sakyanang gikomisyon sa ilang mga local government units.
