BUTUAN CITY – Gi-angkon sa rebeldeng New People’s Army kon NPA nga sila ang misunog sa 2 ka ekwepo kagahapong adlawa sa Brgy. San Pedro, Alegria, Surigao del Norte.
Sa eksklusibong pakighinabi sa Bombo Radyo Butuan, gibutyag sa nagpa-ilang si Ka Diwa Habagat, tigpamaba sa NPA-Agusan Del Norte, nga kini ilang pagsilot kang Alegria Sangguniang Bayan member Reuel Jalasan kinsa midagan pagka-mayor sa maong lungsod.
Tungod matud pa kini sa kawalay respeto niini sa eleksyon diin wala kini makig-estorya kaila aron mahimong hapsay ang dagan sa election period.
Lakip na niini ang pagtiner og daghang armas, pagbaton og private army, pag-quarry nga nakapadaot sa kina-iyahan ug wala pag-aksyon sa reklamo sa mga trabahante sa ubos nga suhulan og kawalay benipisyo.
Sumala pa ni Ka Diwa Habagat, target unta nilang atakihon ang balay sa konsehal tungod kay daghang mga bag-ong armas ang gipondo niini.
Apan tungod sa kutay niini ngadto sa kasundaluhan, kapulisan ug mga pulitiko, wala nila kini masulod.
Gi-angkon usab ni Ka Sandara nga wala na sila maghatag og warning ngadto kang Konsehal Jalasan tungod kay nahibalo na matud pa kini sa iyang mga dautang binuhatan ug human na usab nila kini gipahibalo mahitungod sa ilang palisiya alang sa piniliay.
Lakip sa giklaro usab niini ang nakit-ang patay’ng lawas nga matud pa usa sa mga goons sa mayoralty candidate nga mipabuto gamit ang mubo nga klase sa armas dungan sa pagklaro nga dili ang ilang mga sakop ang nakapusil niini kundi ang mirespondeng tropa sa kagamhanan.
Apan sa gipagawas nga pamahayag ni SB member Reuel Jalasan, dili kini kumbinsido nga ang NPA ang misunog sa iyang payloader og dump truck tungod kay wala matud pa siyay atraso sa mga niini ug hinoon gitudlong motibo niini ang pulitika.
