BUTUAN CITY – Patay ang usa ka pulis ug usa ka job order sa Land Transportation Office kon LTO sa natigayong pinusilay kaganinang alas-3:35 sa kaadlawon sa Brgy Sta. Cruz, lungsod sa San Jose, lalawigan sa Dinagat Islands.
Naila ang namatay’ng pulis nga Patrolman Ferry Sida Jaso, 29-anyos, minyo, lumad nga taga-Mainit, Surigao del Norte ug nadestino sa Criminal Investigation and Detection Group kon CIDG- Dinagat Islands Provincial Field Unit (DIPFU).
Samtang ang laing namatay mao si Anjun Casador, residente sa Purok 1, Barangay Sta. Cruz, San Jose, Dinagat Islands, usa ka job order employee sa lokal nga kagamhanan sa maong lungsod ug na-detail sa LTO-Dinagat Islands.
Base sa inisyal nga imbestigasyon, mihimo og surveillance operation ang mga operatiba sa CIDG-DIPFU batok sa suspetsadong si Casador tungod sa gika-ingong kalambigitan niini sa ilegal nga mga kalihokan.
Pag-abot matud pa sa mga operatiba sa maong lugar, kalit nga gibunlot ni Casador ang iyang armas ug gipusil si Jaso sa ulo resulta sa hinanali niyang kamatayon.
Dinhi na mibalos og pusil ang ka-uban sa pulis nga si Patrolman Leonel Estroso, 31 anyos, minyo ug miyembro usab sa CIDG-DIPFU nga taga-Silang, Cavite.
Nasayrang pito ka higayong gipusil si Casador resulta sa hinanali niining kamatayon.
Gikustodiya sa San Jose Municipal Police Station si Patrolman Estroso alang sa tukmang disposisyon samtang nagpadayon pa ang imbestigasyon sa kapulisan aron masuta ang motibo sa insidente.
