BUTUAN CITY – Gitun-an na sa kapulisan sa lungsod sa Dauis, Bohol ang pagpasaka og kaso sa mag-livein partner tungod sa ilang pagbilin sa dalan sa ilang usa ka tuig pa lang nga anak, human nag-away sa mismong adlaw’ng natawhan sa bata kagahapon, Martes, Enero 27.
Nasayrang na-alarma ang mga tawo nga nakalabay sa national highway sa Brgy Tabulong dihang nakit-an ang bata nga mikamang ug usahay mulingkod sa dalan nga nakuhaan pa og dashcam footage rason nga dali kining gihunungan sa mga nakakita aron maprotektahan.
Daling gidangop ang bata ngadto sa Dauis Municipal Police Station ug migawas sa ilang pagpanubay nga gusto diay sa minor-de-edad nga inahan nga dili una mutrabaho ang iyang ka-ipon tungod kay birthday sa ilang anak apan mas gipili niini nga mulakaw gihapon rason nga gibiyaan sa inahan ang iyang anak kilid sa dalan.
Anaa na ang bata sa kamot sa iyang mga apuhan samtang gihikay na ang mga ebidensya ug dokumentong gamiton sa pagpasaka og kaso batok sa magti-ayon.
