BUTUAN CITY – Mikunhod og halos 70-porsiento ang kaso sa dengue fever dinhi sa Caraga Region, base na sa datus nga gipagawas sa Department of Health kon DOH- Regional Office 13.
Sigon sa Regional Epidemiology and Surveillance Unit kon RESU, base sa ilang Disease Surveillance Report atol sa ikanapulo nga Morbidity Week kansa gikan sa unang semana sa Enero ngadto na sa tunga-tungang bahin ning buwan sa Marso, mi-abot sa kinatibuk-ang 674 ka mga Caraganon nga duna’y dengue fever ang na-admit ngadto sa managlahing disease reporting units sa tibuok rehiyon.
Kini mas ubos og 67.9 porsiento kung ikumpara sa natalang 2,097 ka mga kaso sa susamang mga buwan sa tuig 2016.
Sa maong ihap, 16 ka mga kaso ang naggikan sa Surigao del Sur, siyam sa Agusan del Sur, pito sa Tandag City sa lalawigan sa Surigao del Sur, og duha sa Surigao City.
Hinuon, wala sila’y natumbok nga hotspot barangay gawas lang sa nag-cluster nga mga kaso sa Brgy. Washington (Poblacion), Surigao City og sa Mabua, Tandag City.
Ang Surigao del Sur maoy mitala og pinakadaghang kaso nga mi-abot sa 164 gikan sa unang semana sa Enero ngadto na sa tungang bahin ning buwan sa Marso og gisundan sa Butuan City nga duna’y 109 ka mga kaso, Agusan del Sur – 80, Surigao del Norte – 78, Agusan del Norte og Surigao City parehong duna’y 61 ka mga kaso, Tandag City – 44, Bayugan City – 25, Bislig City – 19, Cabadbaran City – 18 og Dinagat Islands – 15. (Beth Ruiz)
