BUTUAN CITY – Gikumpirma ni Butuan City Councilor Atty. John Gil Unay, membro sa Committee on Good Government sa Sangguniang Panlungsod, nga suspendido og duha ka buwan si Villa Kananga Brgy. Captain Venusto Clarito Jr.
Sa eksklusibong pakighinabi sa Bombo Radyo Butuan, gipadayag ni Konsehal Unay nga nagsumikad kini sa napamatud-ang reklamo sa upat ka mga barangay kagawads tungod matud pa sa semi-ghost project sa ilang barangay ilabina sa bleacher sa ilang covered court.
Base sa reklamong giduso ngadto sa komitibang gipangunahan ni committee chairman Rema Burdeos, duna matud pa’y nakomitar nga anomaliya si Kapitan Clarito hinungdan nga gikasuhan siya og administratibo tungod sa dishonesty, grave misconduct, ug conduct prejudicial to the interest of the public.
Duna matud pa’y delivery sa mga construction materials kansa wala makita sa mga reklamante apan duna’y acknowledgement receipt sa usa ka kagawad kondiin ang kantidad nga nahanaw mi-abot sa dul-an 200-mil pesos.
Base matud pa sa December 22, 2020 resolution, dapat unom ka buwan unta ang suspensyon ni Clarito apan nagduso kini og motion for reconsideration sa komitiba kansa milampos hinungdan nga nakunhuran ngadto sa duha sa buwan na lang ang iyang suspensyon.
Gidugang sa konsehal nga karong semanaha, unom ka mga committee hearings ang himuon sa ilang komite may kalabutan gihapon sa mga administrative cases nga gilambigitan sa mga barangay officials ilabina sa may Brgy. Obrero.
