BUTUAN CITY – Usa ka semana pagbalik sa serbisyo human ang tulo ka buwan gisuspensyon nga gipatuman sa lokal nga kagamhanan ning siyudad sa Butuan, laing suspension order na usab ang gipakanaog sa city government batuk kang Ampayon Brgy. Captain Rodencio Basubas Jr.
Kini ang gikumpirma ni number 1 barangay kagawad ug karon acting Brgy. Captain Dan Maisog sa eksklusibong pakighinabi ning sibyahan.
Gibutyag niining ang ikaduhang suspensyon nga gidoble kaysa unang tulo ka buwan, nagsumikad lang sa pagtumbok nila sa identity sa mga tricycle ug motorized trisicad drivers nga gikan sa managlahing kasikbit nga barangay apan mu-abot pagpamasada sa Ampayon.
Wala matud pa’y laing tumong ang barangay council kondili ang pagpahapsay lang sa pamasada ilabina kung duna’y mureklamo nga mga pasahero tungod kay isyuhan man sila og laminated ID ilabina kung makakuha sila og certificate gikan sa barangay diin sila nagpuyo.
Gihimo matud pang isyu ang pagpabayad sa maong mga driver og 10-pesos alang sa lamination sa ilang ID kansa dili angayang kwestyunon tungod kay gamit man kini sa ilang barangay ug sa ila ra usab nga panudlanan napadulong ang kita niini.
Ang nasangpit nga suspensyon nakapadismaya kanila ilabina nga apil sa suspensyon si Kagawad Vicente Rejas ug kini maka-apekto na usab og dugang sa pagserbisyo nila sa katawhan kinsa daan nang na-apektuhan sa unang pagsuspende sa city government kang Kapitan Basubas.
Madumdumang niadtong Agusto ning tuiga, gi-serve sa punong barangay ang preventive suspension order human gipirmahan ni Mayor Ronnie Vicente Lagnada ang SP resolution no. 286-2020 nga natapos niadto lang Nobyembre 13 ning tuiga.
