BUTUAN CITY – Gila-umang madugangan pa ang ihap sa mga investors sa FRX Rice Trading kon Forex Trading ang magduso sa ilang reklamo batuk sa agent niini human matud pa gisibat ang ilang na-invest nga kwarta.
Kini human nga unang midangop og pormal nang nagreklamo ngadto sa Trento Municipal Police Station ang 17 ka mga investors gikan sa nagkada-iyang lungsod sama sa Trento og uban pang mga lungsod sa Agusan del Sur; Tagum City sa Davao del Norte; ug Mati City sa Davao Oriental.
Sigon sa mga reklamante, gitangag sa agent nga si Edeliza Simbahon Ulep ang 88-milyunes, 338-mil, 900-pesos nga salaping ilang na-pay in.
Gihimo ang pagduso sa ilang reklamo human nga wala na nila makita pa si Ulep dihang ilang giransak ang gipuy-anan niini uban sa lain pang mga investors.
Ang nasangpit nga mga reklamo ang gihimo karong basehan sa kasong ipasaka unya sa maong mga investors batuk kang Ulep.
Nasayrang giransak sa kapin 20 ka mga investors ang pinuy-anan og gipanag-iyanang lodging house sa maong agent ning mi-aging mga adlaw og gipangkuha ang iyang mga appliances sama sa flat screen TV set, air conditioning unit, electric fan, lamisa og uban pa.
Unom kanila ang gibalhog sa bilangguan nga nailang sila Francisco Ayala Pabros, Jhon Rhyn Muta Manug, Junito Hera Vergara, Nicasio Sabandal Jovita, David Zapanta Cuevas og Virgel Prejoles Benito pulos mga residente sa maong lungsod.
