BUTUAN CITY – Nag-uban ang Department of Social Welfare and Development kon DSWD ug ang Surigao City Social Welfare and Development Office (CSWD) alang sa “Katumanan 2026: Exit Ceremony” sa mga benepisyaryo sa 4Ps kon Pantawid Pamilyang Pilipino Program.
Ang “katumanan” nagpasabot og fulfillment sa tumong nga makab-ot ang “self-sufficient level,” kon kaya na sa mga benepisyaryo nga makatindog ug makapalambo sa ilang panginabuhi.
Mi-abot sa 368 ka mga pamilya ang malampusong naka-graduate sa programa kondiin gihatagan sila og sertipiko isip pag-ila sa ilang paningkamot nga makalingkawas gikan sa kalisod sa kinabuhi.
Nagpakita usab og suporta ang Lokal nga Pamahalaan sa Surigao pinaagi sa gihimong “Commitment of Support” nga gisuportahan sa mga stakeholders ug partner agencies aron hatagan ang mga graduates og oportunidad nga makabaton og panginabuhian.
Tumong sa Lokal nga Pamahalaan nga magpadayon sa pagsuporta sa mga kanhi benepisyaryo sa 4Ps aron masiguro nga makab-ot nila ang kalamboan.
