BUTUAN CITY – Miabot sa kapin 300 ang mga tawong nakasinati og stroke atol sa Kapaskuhan sigon sa Department of Health (DOH).
Base sa datos gikan sa walo ka sentinel sites nga gisubaybayan sa DOH, ang mga natalang stroke cases misaka gikan sa 12 niadtong Disyembre 23, 2024 hangtud sa 146 niadtong Enero 2, 2025.
Sa 146 nga kaso, duha ka pasyente ang namatay. Samtang dunay 140 ka stroke patients nga naka-log sa Philippine General Hospital (PGH), ug 41 sa Tondo Medical Center. Kadaghanan sa mga pasyente anaa sa edad 45 hangtud sa 64-anyos.
Sigon usab sa DOH mitaas ang mga kaso sa acute coronary syndrome (ACS) gikan sa mga sentinel sites gikan sa duha lang niadtong Disyembre 22 nga misaka sa 74 niadtong Enero 2. Usa ka pasyente ang gitahong namatay tungod sa ACS, o kalit nga pag-usab sa dagan sa dugo sa kasing-kasing.
Ang mga kaso sa bronchial asthma sa mga sentinel sites sa DOH misaka usab gikan sa unom niadtong Disyembre 22, hangtud sa 80 niadtong Enero 2. Kadaghanan sa mga kaso ang mga batang edad nga 0 hangtud sa 9-anyos.
