BUTUAN CITY – Mukabat sa 1,142 ka mga police personnel sa tibuok rehiyon sa Caraga ang gi-augment sa Police Regional Office kon PRO-13 aron mahimong kabahin sa augmentation force sa mga lugar nga angayang butangan og igong pwersa alang sa tukmang seguridad karong panahon sa eleksyon. Gihatagan sila sa pormal nga send-off ceremonies uban sa ilang counterpart sa 402nd Infantry Brigade, Philippine Army.
Sigon ni PBGen. Gilberto DC Cruz, regional director sa PRO-13, ang maong ihap gikan sa nagkada-iyang police stations, provincial og regional mobile forces ning rehiyon.
Sa eksklusibong pakighinabi ning sibyahan, gibutyag sa opisyal nga andam na sila sa mismong adlaw sa eleksyon karong Mayo 13 og nasultihan na usab ang nasangpit nga pwersa sa ilang tahas.
Base sa ilang monitoring, gila-uman na nila ang malinawong eleksyon base na usab sa assessment sa ilang mga municipal, city og provincial police offices.
Hinuon duna pa sila’y himuong final checking aron seguradong makab-ot ang hapsay og malinawong mid-term elections. Nanawagan usab siya sa tanang katawhan nga makig-alayon sa ilang pwersa og isumbong gilayon ang mga mamatikdang dautang kalihukan atol sa eleksyon sama sa vote buying og uban pa.
Samtang sa panig usab sa 402nd Infantry Brigade, Philippine Army, giklaro ni brigade commander Col. Maurito Licudine nga mukabat sa 2-mil ka mga sundalo ang ilang i-augment alang sa troops deployment sa midterm elections.
Sa eksklusibong pakighinabi ning sibyahan, gibutyag sa opisyal nga ang maong tropa, gikan sa ilang areas of operation sa Agusan del Norte, Surigao del Norte og Sur ingon man sa Dinagat Islands province.
Dugang pa ni Col. Licudine, mihimo na sila og clearing operations ning mi-agi pang mga buwan sa mga lugar nga gi-ila sa COMELEC nga area of immediate concern pinaagi sa ilang gipadalang tropa.
Partikular niini ang mga lungsod sa Tago og San Miguel sa lalawigan sa Surigao del Sur kondiin padayon pa ang ilang gihimong mg operasyon.
