BUTUAN CITY – Giklaro sa Philippine Coast Guard kon PCG-Surigao nga anaa sa luwas nga kahimtang ang 236 ka pasahero sa fast craft nga nabuslot tunga-tunga sa biyahe gikan Surigao Port padulong sa Dapa, Surigao del Norte.
Sa eksklusibong pakighinabi sa Bombo Radyo Butuan, gibutyag ni PCG-Surigao Commander Lawrence Roque, nga gipabalik nila sa pantalan kagahapon sa alas 12:30 sa hapon ang fast craft nga MV Fortune Angel 2 human na-dis-align ang propeller shaft niini og naputol ang usa ka timon tungod sa pagkabanda sa bato nga hatud sa kusog sa current sa tubig.
Sigon sa opisyal napidpid ang fast craft sa lugar diin dunay kusog nga current sa tubig og natunong nga hunas hinungdan sa pagkasangad niini.
Hinuon luwas kining nakabalik sa pantalan human nga gi-rescue sa MV Fortune Angel I nga biyahe niadtong tungora gikan sa Dapa og gi-escortan pabalik sa Surigao City rason sa pagkaluwas sa 236 ka mga pasahero samtang usa ka pasaherong myembro sa PCG ang gidala sa balay tambalanan human na-ipit ang kamot atol sa insidente.
Giklaro usab ni PCG Surigao Commander Lawrence Roque nga dili dagko ang balod dihang natigayon ang insidente taliwa sa nasigpatang low pressure area nga karon nahimo nang bagyo.
