BUTUAN CITY – Giplano ni kanhe Pangulong Rodrigo Duterte nga subling modagan isip Pangulo sa 2028 national elections kung matanggal matud pa sa puwesto ang anak nga si Vice President Sara Duterte pinaagi sa impeachment.
Sigon ni kanhe House speaker ug Davao del Norte First District Pantaleon Alvarez, kuwalipikadong subli nga mokandidato ang kanhe pangulo.
Sumala pa ni Alvarez nga dili sakop sa constitutional ban si Digong tungod kay dili kini re-electionist ug nagpahulay lang sa pila ka tuig human ang unom ka tuig nga termino sa dihang midaug niadtong 2016 presidential elections.
Alayon sa nakalatid sa Batakang Balaod, bawal mokandidato ang usa ka Pangulo kung bag-ohay lang natapos ang termino niini apan sa kaso matud pa ni Digong, kuwalipikado kining subling modagan sa 2028 national polls.
Nagtoo si Alvarez nga daghan pa gihapon ang supporter sa kanhe Pangulo ug kusog ang mahimong away niini sa iyang mahimong mga ka-agbat sa presidential race sa 2028 national elections.
Sa kasamtangan, nakasubaybay ang kanhe pangulo sa mamahimong sangputan sa gidusong impeachment batuk sa anak nga si VP Sara.
