BUTUAN CITY – Subling nanguna si Bol Bol alang sa TNT Tropang 5G sa nagpadayong PBA Commissioner’s Cup. Kini human mi-iskor og 40 puntos ang kanhe second round pick sa NBA aron bitbiton ang TNT Tropang 5G nga modaug batuk sa NLEX Road Warriors sa iskor nga 103-97, sa dula sa Ynares center sa Antipolo.
Lakip sa natala ni Bol ang 15 ka rebounds, duha ka blocks samtang adunayg 18-of-37 sa field.
Nasayrang nag-apas ang Tropang 5G og 6 puntos, 66-72 sa pagsulod sa katapusang kwarter apan inanay kining giapas sa tropa diin tungod sa 3 pointer ni Bol nakadikit sila sa 82-81 nga iskor.
Nagbinayloay pa ug puntos ang duruha ka koponan hangtud nga mihimo ang Tropang 5G sa 8-0 run pinaagi nila Bol, Brandon Ganuelas-Rosser og Jordan Heading.
Nasayang usab ang nahimo sa import sa Nlex nga si Cady Lalanne nga dunay 25 puntos og 21 rebounds lakip na kay Robert Bolick nga nakatala og 21 puntos.
Tungod niini, natilawan sa Road Warriors ang ilang unang kapildihan samtang ang TNT Tropang 5G nakabawi na human napildi sa unang game.
