BUTUAN CITY – Gipalawman karun ang imbestigasyon sa kapulisan sa lungsod sa Santiago, Agusan Del Norte may kalabutan sa pagpamusil nga mipatay sa kanhi secretary general sa progresibong grupo nga Kilusang Mayo Uno kon KMU.
Sigon ni Police Inspector Ralph Avenido, Hepe sa Santiago Municipal Police Station, nahitabo ang pagpamusil kaganinang alas 9:40 sa buntag sa may Purok-1, Barangay Poblacion Uno sa maong lungsod diin gipusil sa riding-in-tandem ang kanhi Secretary General sa KMU-Caraga nga si Linos Cubol.
Sumala pa sa Hepe nga anaa lang sa iyang furniture shop, mga usa ka kilometro ang gelay-on gikan sa police station, ang biktima sa dihang miabot ang duha nga wala mailang suspetsado sakay sa single motor ug dayung pusil gamit ang 45 nga kalibre sa pistola.
Duha ka samad pinusilan diha sa ulo ug 3 sa lawas ang na-angkon sa biktima nga gidala pa sa Cabadbaran District Hospital apan gideklarang dead-on-arrival sa attending physician samtang ang suspek daling misibat padulong sa Surigao Area.
Sa kasamtangan duna na silaygihimung cartographic sketch base sa pagsaysay sa mga trabahante sa furniture shop nga nakasaksi sa panghitabo diin wala naka-bonnet ang mga suspek.
Lakip sa inisyal nga nakitang anggulo sa maong hitabo ang mahitungod sa mina diin ang biktima dunay gireklamong mga tawo nga posibleng nasuko kaniya. (Rolan Janea)
