BUTUAN CITY – Gipalawman pa karun ang imbestigasyon sa kapulisan sa may General Luna, Surigao Del Norte sa pagpusil-patay sa kanhe kapitan nga gikonsiderang high value target.
Gikumpirma ni Police Chief Insp. Joel Leong, Hepe sa General Luna Municipal Police Station nga nahitabo ang pagpamusil kagahapon sa alas 8:45 sa gabii dool lang sa panimalay sa biktimang si Kanhe Barangay Tawin-tawin kapitan Jinkylito Consigo Ortojan, 51-anyos.
Base sa imbestigasyon, naa lay gi-adtu sa silingan ang biktima og sa dihang patabok na kini sa dalan sa iyang pagpauli, mga 20 metros ang gelasyon sa iyang panimalay, kalit lang mitunga ang mga suspetsadong naka-single motor og gipusil ang biktima sa makadaghang higayon.
Upat ka mga igo sa lawas ang nahiagum sa biktima nga nadala pa sa Siargao District Hospital apan gideklarang dead-on-arrival sa attending physician.
Narekober ang mga basyo sa .45 nga pistola nga maoy gigamit sa mga suspetsado. Sumala pa ni Police Chief Insp. Leong, misurender na niadtong Hunyo 2018 sa ilang oplan tokhang ang biktima.
Lakip sa ilang gipakisayran ang motibo sa maong pagpamusil apan gipahayag nga hanap kaayung binuhatan kini sa gobyerno tungod kay mitabang paman gane ang kagamhanan sa mga nalambigit sa ilegal nga drugas nga dili hingpit nga madaot sa maong bisyu.
