BUTUAN CITY – Arestado ang nagpapili pagka-board member sa unang distrito sa Surigao del Sur, human nakuhaan og mga armas og mga bala sa hini-usang operasyon sa pwersa sa Tandag City Police Station, Surigao del Sur Provincial Intelligence Branch, ug 2nd company sa Surigao del Sur Provincial Mobile Force ning mi-aging alas-7:45 sa gabii.
Sumala ni Police Maj. Rey Sorreda – hepe sa Tandag City Police Station, pakyas kini pagpresentar ug legal documents sa gipanag-iyahang mga armas.
Sa implementasyon sa search warrant sa buhatan sa Gabriel Security Agency nga gipanag-iyahan ni Isidro Lozada, 62 anyos, sa Barangay Bag-ong Lungsod, Tandag City, narekober sa mga otoridad ang 41 ka caliber .38 revolvers, 200 ka rounds sa buhing bala ug 21 ka wala’y sulod nga magazines sa KG9.
Sa pagkakaron gihulat na lang nila ang resulta sa gisang-at nga request ngadto sa Kampo Crame aron masuta kung duna’y mga papeles ang nasangpit nga mga armas og higayong mapakyas kini pag abot, mamahimong regular filing na unya ang himuong pagduso sa kaso batuk sa suspek.
