BUTUAN CITY- Gilatid sa Bureau of Fire Protection Caraga Regional Office 13, ang nagkadaiyang kalihokan alang sa pagsaulog sa Fire Prevention Month 2026 nga adunay temang “Sa pag-iwas sa sunog, hindi ka nag-iisa”, atol sa gipahigayon press conference.
Sumala ni FSINSP. Chariemel Y. Pingol, Acting Chief sa Fire Safety Enforcement Division, nga ang maong selebrasyon naglangkob sa lain-laing programa ug kampanya kansa nagtumong sa pagpalig-on sa kahibalo sa publiko kalabot sa paglikay sa sunog ug sa hustong pamaagi sa pagresponde sa emerhensiya.
Lakip sa mga kalihokan mao ang information drive sa mga komunidad ug eskwelahan, fire safety seminars, fire drills, ug uban pang aktibidad nga nag-awhag sa mga residente nga mahimong alerto ug responsable aron malikayan ang insidente sa sunog.
Gipasabot usab sa opisyal nga pinaagi sa maong mga kalihokan, nagtinguha ang BFP nga mapalambo ang kooperasyon sa komunidad ug sa mga lokal nga panggamhanan aron masiguro ang kaluwasan sa publiko batok sa peligro sa sunog.
