BUTUAN CITY – Nagsumite ang depensa ni kanhi Pangulong Rodrigo Duterte og bag-ong medical records sa International Criminal Court (ICC) may kalabotan sa kasamtangang kahimtang sa pangisip sa kanhi Pangulo.
Sa gipasa nga medical record sa depensa, gikumpirma nga adunay “cognitive impairment” ang kanhi Pangulo. Base sa dokumento, gipresentar sa depensa ang maong submission human sa gipadalang email communication sa Pre-trial Chamber niadtong Hulyo 18 may kalabotan sa parehas nga isyu aron mahatag sa Chamber ug maapil sa record sa kaso ang bag-ong medical records nga ilang nadawat bag-ohay lang.
Gipasabot sa depensa nga ang maong evaluation gihimo sa usa ka medical professional nga gitudlo mismo sa medical officer sa ICC Detention Center, nga nagkumpirma sa dugay na nilang suspetsa nga adunay cognitive impairment ang kanhi Pangulo. Matod ni lead counsel Nicholas Kaufman, gihimo ang maong submission nga may kalit nga panginahanglan tungod sa kalabotan sa maong medical records sa isyu kung kaya ba gyud o dili sa kanhi Pangulo nga moatubang sa trial.
Kini usab may kalabotan sa kanhing urgent request nga ipahunong ang paghukom sa interim release hangtod ang tanang medical records lakip na ang neuropsychological evaluation masumite sa korte.
Samtang, tungod sa mga nadiskubre, giingon sa depensa nga ang cognitive impairment sa kanhi Pangulo igo na nga basihan aron ipadayon ang paglilitis sa maong isyu sa wala pa ang confirmation hearing.
Pormal nga gisulod ang maong mga dokumento sa case record kagahapon, Setyembre 29.
