BUTUAN CITY – Gipahibalo sa Qatari Defense Ministry nga adunay pipila ka missile gikan sa Iran nga niigo sa ilang pangunang gas facility sa northern coast.
Base sa report, gipuntirya sa Iran ang dagkong pasilidad sa Ras Laffan Industrial City, usa ka Liquefied Natural Gas (LNG) hub sa maong nasod.
Gibanabana nga moabot sa lima ka missile ang nahulog sa maong lugar, diin usa niini ang niigo sa usa ka importante nga oil facility.
Sa pagkakaron, wala pa’y eksaktong report kung unsa kalapad ang kadaot, apan sumala sa ministry, nagdala kini og dakong kadaut sa gas facilities, mga residente, ug uban pang industriya sa lugar.
Nakaresulta usab kini og dako nga sunog sa maong lugar.
Gihulagway sa Qatari Defense Ministry ang maong pag-atake isip direktang hulga sa national security sa Qatar.
Sa pagkakaron, wala pa nagpagawas og opisyal nga pahayag ang gobyerno kung motubag ba sila o mubalos sa maong pag-atake.
Hinumduman nga kaniadto nagbanta na ang Iran nga apilon ang mga regional energy facilities sa Middle East samtang nagsugod ang giyera sa maong rehiyon.
